मुइज्जुको बढ्न थाल्यो भारतप्रति झुकाउ, स्वतन्त्रता दिवसमा पठाए सन्देश

चीनसँग नजिकिएको माल्दिभ्सको अहिले भारतप्रति झुकाउ बढ्न थालेको छ। मालदिभ्सका राष्ट्रपति मोहम्मद मुइज्जुले भारतप्रति पुनः सकारात्मक दृष्टिकोण देखाएका छन् । मुइज्जुले भारतको ७८औँ स्वतन्त्रता दिवसको अवसरमा शुभकामना सन्देश पठाएका छन् ।

सामाजिक सञ्जाल प्लेटफर्म एक्समा एक बधाई सन्देशमा माल्दिभ्सका राष्ट्रपतिले भने, ‘भारतको स्वतन्त्रता दिवसको अवसरमा म राष्ट्रपति, प्रधानमन्त्री नरेन्द्र मोदी र भारतका जनतालाई हार्दिक शुभकामना व्यक्त गर्दछु।’ नयाँ दिल्ली र मालेबीच बलियो सम्बन्ध रहेको उल्लेख गर्दै उनले भने, ‘इतिहासमा निहित हाम्रो स्थायी मित्रता माल्दिभ्स र क्षेत्रको समृद्धि र विकासलाई प्रवर्द्धन गर्न विकसित भएको छ। भविष्यलाई हेर्दै जाँदा, म विश्वस्त छु कि हाम्रो साझेदारी बलियो भइरहनेछ, जसले पारस्परिक समृद्धि र साझा लक्ष्यहरू प्राप्त हुनेछ।

उल्लेखनीय छ, सन् २०२३ को अन्त्यमा चीन समर्थक मोहम्मद मुइज्जु माल्दिभ्सका राष्ट्रपति बनेपछि माले र नयाँ दिल्लीबीचको सम्बन्धमा तनाव उत्पन्न भएको थियो । राष्ट्रपति चुनावमा इन्डिया आउट अभियान चलाउने मोहम्मद मुइज्जुले माल्दिभ्समा भारतीय सैनिकको मुद्दालाई देशको सत्ता हातमा लिएपछि मात्र उठाएका थिए । यी सैनिकहरू माल्दिभ्समा भारतले दिएको विमान र विमान सञ्चालनमा सहयोग गर्न उपस्थित थिए। यसपछि भारतले सैनिकको सट्टामा नागरिक कर्मचारी तैनाथ गरेको थियो ।

मुइज्जुले राष्ट्रपति बनेदेखि नै भारत विरोधी अडान अपनाएका थिए । तर, हालै मुइज्जुको अडानमा एक महत्वपूर्ण परिवर्तन देखा परेको छ। मुइज्जु प्रधानमन्त्री नरेन्द्र मोदीको सपथ ग्रहण समारोहमा पनि सहभागी भएका थिए । राष्ट्रपति बनेपछि उनको यो पहिलो भारत भ्रमण थियो । मे महिनामा मुइज्जुका विदेशमन्त्री मुसा जमीर भारत भ्रमणमा आएका थिए । यसलाई मुइज्जु सरकारबाट भारतसँगको सम्बन्ध सुधार्ने संकेतका रूपमा हेरिएको थियो।

भारतीय विदेशमन्त्री एस जयशंकरले अगस्ट ९-१२ सम्म तीन दिने भ्रमणमा मालेको भ्रमण गरेका थिए। यस क्रममा माल्दिभ्सको मुइज्जु सरकारले उनलाई भव्य स्वागत गरेको थियो । जयशंकरसँगको भेटमा मुइज्जुले भारतको सहयोगका लागि प्रधानमन्त्री नरेन्द्र मोदीलाई धन्यवाद दिएका थिए । माल्दिभ्सको विदेश मन्त्रालयले विदेश मन्त्री एस जयशंकरको माले भ्रमणलाई द्विपक्षीय सम्बन्धमा एक महत्वपूर्ण कोसेढुङ्गाको रूपमा वर्णन गरेको छ।