चीनसामु बंगलादेशको युनुस सरकारको बिन्ती, ऋण चुक्ता गर्न माग्यो थप म्याद

बंगलादेशकी पूर्व प्रधानमन्त्री शेख हसिनाले देश छाडेको केवल एक महिनापछि बंगलादेशले चीनसँग बिन्ती गर्न थालेको छ । मोहम्मद युनुसको नेतृत्वमा रहेको बंगलादेशको अन्तरिम सरकारले विद्यमान ऋणको ब्याजदरलाई घटाएर एक प्रतिशतमा गर्ने चीनसँग गुहार लगाइरहेको छ । यसको साथै ऋण चुक्ता गर्ने अवधि पनि ३० वर्ष पुर्यानउन अनुरोध गरिरहेको छ । बंगलादेशी मिडियाले रिपोर्ट गरेको छ कि बंगलादेशको अर्थ मन्त्रालयको आर्थिक सम्बन्ध डिभिजन (ईआरडी) ले यस हप्ताको सुरुमा चीनलाई पत्र पठाएको छ। हाल चिनियाँ ऋणको ब्याजदर २ देखि ३ प्रतिशत रहेको छ, जुन २० वर्षमा चुक्ता गर्नुपर्नेछ ।

ईआरडी अधिकारीहरूलाई उद्धृत गर्दै प्रस्तुत गरिएको मिडिया रिपोर्टमा बंगलादेशले चीनबाट नयाँ ऋण लिने योजना बनाएको पनि उल्लेख गरिएको छ। अधिकारीहरूले भनेका छन्- यदि बंगलादेशले विद्यमान चिनियाँ ऋणहरूको ब्याज दर कटौती सुरक्षित गर्न सकेनन् भने, बंगलादेशले लामो चुक्ता सर्तहरूको साथ नयाँ चिनियाँ ऋणहरू लिने प्रयास गर्नेछन्। शेख हसिनाको राजीनामापछि बंगलादेश अस्थिरतासँग जुझिरहेको छ । मुलुकमा वैदेशिक ऋणको दबाब बढ्दै गएको छ ।

यसै साता बुधबार अन्तरिम सरकारका प्रमुख सल्लाहकार मोहम्मद युनुसले राष्ट्रका नाममा सम्बोधन गर्दै देशको कमजोर आर्थिक अवस्थाको उल्लेख गरेका थिए । उनले बंगलादेशको विदेशी मुद्रा सञ्चिति तीव्र गतिमा घट्दै गएको बताए। यसमा दबाब कम गर्न, बंगलादेशले विदेशी ऋणका लागि कम ब्याज दर र विस्तारित पुनर्भुक्तानीको माग गरिरहेको छ।

प्रोफेसर युनुसले बंगलादेशले चीनलाई आफ्नो ऋणको ब्याजदर घटाउन र चुक्ता गर्ने अवधि बढाउन अनुरोध गरेको बताए। सन् २०१६ को अक्टोबरमा आफ्नो बंगलादेश भ्रमणका क्रममा चिनियाँ राष्ट्रपति सी जिनपिङले आगामी चार वर्षमा २७ वटा परियोजना कार्यान्वयन गर्न २० अर्ब डलर दिने वाचा गरेका थिए। यो कुनै पनि देशले बंगलादेशलाई दिएको सबैभन्दा ठूलो रकम हो। ईआरडीको तथ्याङ्कअनुसार यो जनवरीसम्म ढाका र बेइजिङले जम्मा ८.०८ अर्ब डलरका केवल नौवटा आयोजनामा सम्झौता गर्न सफल भएका थिए । जसमा बंगलादेशले केवल ४ अर्ब ९१ करोड मात्रै प्रयोग गर्न सकेको छ ।

मोहम्मद युनुसले भने कि बंगलादेशले रुसलाई पनि ब्याजदर घटाउन र विस्तारित ऋण चुक्ता गर्न अनुमति दिन आग्रह गरेको छ । युनुसले रुपपुर आणविक ऊर्जा केन्द्रको अग्रिम भुक्तानी र बक्यौता ऋणका सम्बन्धमा सरकारले रुससँग वार्ता गरिरहेको बताए । ढाकाले आणविक प्लान्टका लागि रुसबाट ११ अर्ब ३८ करोड डलर ऋण लिएको छ, जसमा परियोजना लागतको ९० प्रतिशत खर्च हुन्छ । यसबाहेक आयोजनाको प्रारम्भिक कामका लागि बंगलादेशले ५० करोड डलर अतिरिक्त ऋण पनि लिएको छ ।