कांग्रेस बीआरआईको ऋण सहायता नलिने पक्षमा प्रतिबद्ध : प्रवक्ता महत

नेपाली कांग्रेसका प्रवक्ता प्रकाशशरण महतले बीआरआई परियोजना अन्तर्गत ऋण सहायता लिन नहुने पक्षमा कांग्रेस प्रतिबद्ध रहेको बताएका छन् । उनले यदि चीनले त्यसलाई अनुदान सहायताकोरुपमा दिन तयार भए नेपालले त्यसलाई अघि बढाउनु उपयुक्त हुने बताए । 

प्रधानमन्त्री केपी शर्मा ओलीको चीन भ्रमणको चर्चा भइरहेका बेला शुक्रबार संघीय संसद् भवन बानेश्वरमा सञ्चारकर्मीसँगको कुराकानीमा प्रवक्ता महतले प्रधानमन्त्रीको चीन भ्रमणका बेला उक्त परियोजनाबारे स्पष्ट कुराकानी गर्नुपर्ने बताए । उनले आफू परराष्ट्रमन्त्री भएकै बेला चीनसँग सो परियोजनामा सम्झौता भएको स्मरण गर्दै त्यसमा लगानी, कनेक्टिभिटी र प्राविधिक सहयोगका कुराहरु भएकाले त्यसलाई अनुदानको रुपमा अघि बढाउन उपयुक्त हुने कांग्रेसको धारणा रहेको बताए । ‘सधैँ ऋणको भरमा देश चल्न सक्दैन । अब फेरि चीनसँग मात्रै होइन, अरु कुनै पनि देशबाट ऋण थप गर्नुहुदैन भन्ने हाम्रो कुरा हो,’ उनले भने । प्रवक्ता महतले चीनले विगतमा अनुदान सहायता दिने कुरा गर्दै आएकाले अहिले त्यो विषयलाई अघि बढाउन उपयुक्त हुने बताए ।

उनले भने, ‘बीरआईबारे कांग्रेसको केही पनि दोधार नीति छैन । हामीले अहिले ऋण लिन सकिँदैन भनेको मात्रै हो । हामीले बीआरआई हुँदैन पनि भनेका छैनौं । त्यो समझदारी पत्रमा मैले नै हस्ताक्षर गरेको हो । त्यो हस्ताक्षरमा खाली लगानी, कनेक्टिभिटी, प्राविधिक सहयोगका कुराहरु छन् । अब कस्तो सहयोग गर्ने भन्ने कुरा आउँदाखेरि हामी के चाहन्छौँ भने केनेक्टिभिटीका कुरा सुरुङमार्ग, सडकमा अनुदान सहयोग दिनुपर्‍यो । अनुदान दिने कुरा नै चिनियाँ सरकारको कयौँ वर्षदेखि कार्यान्वयन भएको छैन । त्यसलाई कार्यान्वयन गर्नुपर्‍यो । अनुदान नै कार्यान्वयन भएको छैन, अहिले ऋणको कुरा गरेर के अर्थ ? अहिले हाम्रो ऋणको भार पनि धेरै भएको छ ।’

प्रधानमन्त्री केपी शर्मा ओलीको आसन्न चीन भ्रमणमा सो परियोजनाको कार्यान्वयन योजनामा पनि हस्ताक्षर गर्नुपर्ने चीन सरकारको प्रस्ताव छ । तर सत्तारुढ प्रमुख घटक कांग्रेसले भने चीनले विगतमा गरेका सहमतिअनुसार सो परियोजना अन्तर्गत नै अनुदान सहयोग दिनुपर्ने अडान राखेको छ ।