चीनको अर्थतन्त्र मन्दीबाट बाहिरिन संघर्षरत, सरकारी प्रयासहरू असफल

चीनको अर्थतन्त्र मन्दीको लामो अवधि पार गर्न विभिन्न उपायहरू अपनाउँदा पनि सुधार हुन सकेको छैन। ब्याजदर कटौती, सरकारी खर्च वृद्धि, र पुराना सवारी साधनहरू प्रतिस्थापन गर्न विद्युतीय सवारी साधनहरूका लागि अनुदान जस्ता उपायहरू लागू गरिए तापनि अपेक्षित प्रभाव देखिएको छैन। सन् २०२४ को दोस्रो त्रैमासिकमा वृद्धि दर ४.७ प्रतिशतमा खुम्चिएको छ, जुन अघिल्लो चौमासिकको ५.३ प्रतिशतभन्दा तल हो। कारखाना उत्पादन, खुद्रा बिक्री, र लगानीको वृद्धि दर पनि निराशाजनक देखिएको छ भने बेरोजगारी दर ६ महिनाको उच्च स्तरमा पुगेर अगस्टमा ५.३ प्रतिशत पुगेको छ।

चीनको ७५ औं राष्ट्रिय दिवसको अवसरमा राष्ट्रपति सी जिनपिङले आगामी दिनहरू अझै चुनौतीपूर्ण हुने चेतावनी दिएका छन्। चीनको आन्तरिक समस्याहरूसँगै, संयुक्त राज्य अमेरिका, क्यानाडा, र युरोपेली संघले चीनबाट आयात हुने विद्युतीय सवारी साधनमा उच्च करहरू लगाउँदै सस्तो सामानको डम्पिङलाई रोक्न प्रयास गरिरहेका छन्, जसले चीनको आर्थिक मन्दीलाई थप जटिल बनाएको छ।

चीनको अचल सम्पत्ति क्षेत्र पनि संकटमा परेको छ, जहाँ एभरग्रान्ड र कन्ट्री गार्डेन जस्ता ठूला विकासकर्ता दिवालिया हुने वा परिसमापन प्रक्रियामा छन्। यस आवास बजारको संकटले निर्माण सामग्री, गृह सजावट, र घरेलु उपकरणहरू जस्ता सम्बन्धित उद्योगहरूमा गम्भीर प्रभाव पारिरहेको छ।

अन्तर्राष्ट्रिय मुद्रा कोषले सन् २०२५ सम्ममा चीनको आर्थिक वृद्धिदर ४.५ प्रतिशतमा खुम्चिने र २०२९ सम्ममा ३.३ प्रतिशतमा झर्ने प्रक्षेपण गरेको छ। वृद्ध जनसंख्या र उपभोक्ता विश्वासमा आएको गिरावटले गर्दा चीन थप आर्थिक मन्दीतर्फ धकेलिने जोखिममा छ। नेपालआज